ದಾಸರಪದ (ಆ)

ಆದದ್ದೆಲ್ಲ ಒಳಿತೇ ಆಯಿತು 

ರಾಗ: ಪಂತುಸರಾಳಿ ರಾಗ: ಆಟ

 

ಆದದ್ದೆಲ್ಲಾ ಒಳಿತೇ ಆಯಿತು ||ಪ||

ನಮ್ಮ ಶ್ರೀಧರನ ಸೇವೆಗೆ ಸಾಧನ ಸಂಪತ್ತಾಯಿತೂ ||ಅ ಪ|| 

 

ದಂಡಿಗೆ ಬೆತ್ತ ಹಿಡಿಯುವುದಕ್ಕೆ

ಮಂಡೆ ಮಾಚಿ ನಾಚುತಲಿದ್ದೆ

ಹೆಂಡತಿ ಸಂತತಿ ಸಾವಿರವಾಗಲಿ

ದಂಡಿಗೆ ಬೆತ್ತ ಹಿಡಿಸಿದಳಯ್ಯ  ||೧||

 

ಗೋಪಾಳ ಬುಟ್ಟಿ ಹಿಡಿಯುವುದಕ್ಕೆ

ಭೂಪತಿಯಂತೆ ಗರ್ವಿಸುತಿದ್ದೆ

ಆ ಪತ್ನೀಕುಲ ಸಾವಿರವಾಗಲಿ

ಗೋಪಾಳ ಬುಟ್ಟೀ ಹಿಡಿಸಿದಳಯ್ಯಾ ||೨||

 

ತುಳಸೀ ಮಾಲೆಯ ಹಾಕುವುದಕ್ಕೆ 

ಅರಸನಂತೆ ನಾಚುತಲಿದ್ದೆ

ಸರಸಿಜಾಕ್ಷ ಶ್ರೀ ಪುರಂದರ ವಿಠಲನು

ತುಳಸೀಮಾಲೆ ಹಾಕಿದನಯ್ಯಾ ||೩||