ಭಾವಗೀತೆ (ದ)
ದೇಹಕಿರುವ ಆತ್ಮದಂತೆ
ದೇಹಕಿರುವ ಆತ್ಮದಂತೆ
ನಮ್ಮ ಬುವಿಗೆ ಪರಿಸರ
ಉಳಿಸಿ ಬೆಳೆಸಿ ಕೊಂಡರೇನೇ
ನಮ್ಮ ಬದುಕು ಸುಂದರ |
ಇಲ್ಲದಿರೆ ಕಂದರ ||
ಉಣಿಸಿ ತಿನಿಸಿ ಬೆಳೆಸುತೇವೆ
ನಮ್ಮ ಮುದ್ದು ಮಕ್ಕಳ
ಅಂತೆ ಏಕೆ ಬೆಳೆಸಲಿಲ್ಲ
ಎಂದೂ ಗಿಡ ಮರಗಳ |
ವನ್ಯಮೃಗ ಖಗಗಳ ||
ನಿತ್ಯ ಜನ ಹೆಚ್ಚುವಂತೆ
ಬುವಿಯು ಎಂದೂ ಹೆಚ್ಚಳು
ಸುಲಿಗೆ ಮಾಡ ಹೊರಟರೆ
ನಮ್ಮನೆಂದೂ ಕ್ಷಮಿಸಳು |
ನುಂಗಿ ನೀರ ಕುಡಿವಳು ||
ಗಾಳಿ ನೀರು ಬೆಳಕುಗಳಲೆ
ನಮ್ಮ ಬದುಕು ಅಡಗಿದೆ
ಅದನೆ ಮಲಿನಗೊಳಿಸೋ ನಮಗೆ
ಎಂಥ ಭೂತ ಹಿಡಿದಿದೆ |
ಸ್ವಾರ್ಥ ಮೇರೆ ಮೀರಿದೆ ||
-ಮಾನಸ