ದಾಸರಪದ (ಚ)

ಚಂದ್ರಚೂಡ ಶಿವಶಂಕರ ಪಾರ್ವತಿರಮಣನೆ ನಿನಗೆ 

ನಮೋ ನಮೋ |ಪ| 

ಸುಂದರ ಮೃಗವರ ಪಿನಾಕಧನುಕರ ಗಂಗಾಶಿರ 

ಗಜಚರ್ಮಾಂಬರಧರ |ಅ.ಪ.| 

 

ನಂದಿವಾಹನಾನಂದದಿಂದ ಮೂರ್ಜಗದಿ  ಮೆರೆವ ನೀನೆ 

ಅಂದು ಅಮೃತ ಘಟದಿಂದುದಿಸಿದ ವಿಷ ತಂದು ಭುಜಿಸಿದವ ನೀನೆ

ಕಂದರ್ಪನ ಕ್ರೋಧದಿಂದ ಕಣ್ತೆರೆದು ಕೊಂದ ಉಗ್ರ ನೀನೆ 

ಇಂದಿರೇಶ ಶ್ರೀರಾಮನ ಪಾದವ ಚೆಂದದಿ ಪೊಗಳುವ ನೀನೆ  |೧|

 

ಬಾಲಮೃಕಂಡಜನ ಕಾಲನು ಎಳೆವಾಗ ಪಾಲಿಸಿದವ ನೀನೆ 

ವಾಲಯದಿ ಕಪಾಲ ಪಿಡಿದು ಭಿಕ್ಷ ಬೇಡೋ ದಿಗಂಬರ ನೀನೆ 

ಕಾಲಕೂಟವನು ಪಾನ ಮಾಡಿದ ನೀಲಕಂಠನು ನೀನೆ 

ಜಾಲಮಾಡಿದ ಗೋಪಾಲನೆಂಬ ಪೆಣ್ಣಿಗೆ ಮರುಳಾದವ ನೀನೆ |೨| 

 

ಧರೆಗೆ ದಕ್ಷಿಣ ಕಾವೇರಿ ತೀರ ಕುಂಭಪುರವಾಸನು ನೀನೆ

ಕೊರಳೊಳು ರುದ್ರಾಕ್ಷಿ ಭಸ್ಮವ ಧರಿಸಿದ ಪರಮ ವೈಷ್ಣವ ನೀನೆ 

ಕರದಲಿ ವೀಣೆಯ ನುಡಿಸುವ ನಮ್ಮ ಉರಗಭೂಷಣನು ನೀನೆ 

ಗರುಡಗಮನ ಶ್ರೀ ಪುರಂದರವಿಠಲಗೆ ಪ್ರಾಣಪ್ರಿಯನು ನೀನೆ |೩| 

 

ಚಿರಂಜೀವಿಯಾಗೆಲೊ ಚಿಣ್ಣ ನೀನು

ಹರಿದಾಸ ದಾಸ ದಾಸರ ಪಾದಧೂಳಾಗಿ | ಪ| 

 

ಜರಿಯಬ್ಯಾಡ ಹರಿಯ ಮರೆಯಬ್ಯಾಡೆಂದೆಂದು 

ತಿರಿಯಬ್ಯಾಡ ಖಳರ ಮನೆಗೆ ಪೋಗಿ 

ಓರೆಯಬ್ಯಾಡನ್ಯರಿಗೆ ತತ್ವಗಳನು 

ಬೆರೆಯಬ್ಯಾಡ ಅನ್ಯಸತಿಯ ಸ್ವಪ್ನದಲಿ |೧| 

 

ಸಾಲ ಮಾಡಲು ಬೇಡ ಸಾಲದೆನ್ನಲು ಬೇಡ 

ನಾಳಿಗೆ ಹ್ಯಾಂಗೆಂಬೊ ಚಿಂತೆ ಬೇಡ 

ಖೂಳ ಜನರೊಡನೆ ಮಿತ್ರತ್ವ ಮಾಡಲಿಬೇಡ 

ಬಾಳುವರ ಸಂಗಡ ಬಾಳೆಲೊ ಬಾಲಾ |೨| 

 

ಲೋಕವಾರ್ತೆಯು ನಿನ್ನ ಕಿವಿಕೇಳಿಸಲು ಬೇಡ 

ಶ್ರೀಕಾಂತನ ವಾರ್ತೆ ಕೇಳದಿರಬೇಡ 

ಪಾಕವನು ಮಾಡಿ  ಏಕಾಂಗಿಯಾಗಿ  ಉಣಬೇಡ 

ಲೌಕಿಕವನುಸರಿಸಿ ದಣುಕೊಳಲಿ ಬೇಡ |೩|

 

ಪಂಡಿತರು ಪಾಮರರು ಆರಾದರೂ ನಿನ್ನ 

ಕಂಡವರಿಗೆಲ್ಲ ಕೌತುಕ ತೋರಲೀ 

ಹೆಂಡಿರು ಮಕ್ಕಳು ಅಳಿಯ ಸೊಸೆ ಮೊಮ್ಮಕ್ಕಳು 

ಉಂಡುಟ್ಟು ದ್ವಿಜರುಸಹ ಗಂಡುಗಲಿಯಾಗಿರೆಲೊ |೪| 

 

ಮಂದ ಮತಿಗಳ ಕೂಡ ಮಾತಾಡದಿರು ಹರಿ

ನಿಂದಕರ ಕಣ್ಣೆತ್ತಿ ನೋಡಬೇಡ 

ಇಂದಿರಾರಮಣ ಸಿರಿ ವಿಜಯವಿಠಲನ ಚರಣ 

ದ್ವಂದ್ವದಲಿ ಮಸ್ತಕವನಿಡದಿರಬೇಡ |೫| 

 

ಚರಣವ ತೋರೈ ಚೆಲುವರ ಅರಸನೆ 

ಚರಣವ ತೋರೈ |ಪ|

ಸ್ಮರಣೆ ಮಾತ್ರದಲಿ ಮುಕುತಿಯ ಕೊಡುವ

ಚರಣವ ತೋರೈ |ಅ.ಪ|

 

ರಮ್ಮೆಯ ಮನಕೆ ಬೆಡಗು ತೋರಿದ ಚರಣವ ತೋರೈ

ಬೋಮ್ಮಾದಿಗಳ ಮನಕೆ ನಿಲುಕದ ಚರಣವ ತೋರೈ

ಚಿಮ್ಮಿ ರಾವಣನ ಬಲುದೂರವ ಗೈದ ಚರಣವ ತೋರೈ

ಘಮ್ಮನೆ ಮೊಸರ ಮೆದ್ದು ನಡೆದ ಚರಣವ ತೋರೈ |೧|

 

ಗೋಕುಲಭೂಮಿಯ ಪಾವನಮಾಡಿದ ಚರಣವ ತೋರೈ

ಲೋಕವನೆಲ್ಲ ಅಡಗಿಸಿಕೊಂಡ ಚರಣವ ತೋರೈ

ಬೇಕೆಂದು ಕುಬುಜೆಯ ಮನೆಗೆ ಪೋದ ಚರಣವ ತೋರೈ

ನೂಕಿಭವಾಬ್ಧಿಯ ಬತ್ತಿಸಿಬಿಡುವ ಚರಣವ ತೋರೈ |೨|

 

ಬಿಡದಲೆ ಸರ್ವಜ್ಞತೀರ್ಥರಿಗೊಲಿದ ಚರಣವ ತೋರೈ

ಬಡವರಾಧಾರ ದಿವ್ಯಭೂಷಣವಿಟ್ಟ ಚರಣವ ತೋರೈ

ಕಡುಮುದ್ದುಸಿರಿಕೃಷ್ಣ ವಿಜಯವಿಠಲ ನಿನ್ನ ಚರಣವ ತೋರೈ

ಉಡುಪಿಯ ಸ್ಥಳದಲಿ ನಿಂದು ಪೂಜೆಯಗೊಂಬ ಚರಣವ ತೋರೈ